الدهون المضرة و الدهون المفيدة، تعرفهم أزاي!

كلمة دهون سمعتها سيئة عند كل الناس، أي حد بيحاول يعمل دايت بيكون فاهم أن البعد عن أي حاجة فيها دهون هو أهم حاجة يعملها عشان يحقق أسرع و أحسن نتايج، و ده لأن الدهون و الكوليسترول معروف أنها بتسبب أمراض كتيرة منها السمنة و السكر و أمراض القلب، لكن الحقيقة أنه زي ما فيه دهون مضرة لصحتك، فيه دهون بتحسن صحتك و بتخلي أكلك متوازن، و عشان كده لازم نعرف الفرق بين الدهون المضرة و الدهون المفيدة:

fast food

إيه هي الدهون المضرة ؟

أغلب أنواع الأكل فيها دهون، لكن اللي بيحدد هي دهون مضرة ولا مفيدة هو نوع الدهون الأساسي فيها، و منهم الدهون المشبعة اللي بتكون موجودة في الدهون الحيوانية و منتجات الألبان و منها اللحوم و جلد الفراخ و الزبدة و الأجبان و الكريمة، و كمان بعض الزيوت زي زيت النخيل، و الدهون غير المشبعة و دي بتيجي من الزيوت المهدرجة و بتمثل اسوأ أنواع الدهون، بتكون موجودة في الأكل المقلي زي الفرنش فرايز أو الدوناتس و الفاست فوود، و البسكوت و المخبوزات و الشيبسي و المنتجات المعلبة المشابهة.

الدهون المشبعة بتزود مستوى الكوليسترول في الدم و بتحتوي على بروتين LDL اللي بيرفع من أحتمالية الأصابة بأمراض القلب و السكر، الدهون غير المشبعة برضه بتزود بروتين LDL في جسمك ده غير أن أحتمالية أنها تسبب أمراض قلب أعلى بـ 3 أضعاف من الدهون المشبعة.

healthy fat

خلينا في الدهون المفيدة!

الدهون المفيدة هي نوعين: الدهون غير المشبعة الأحادية و الثنائية، و عشان كده المفروض أكلك يحتوي على كمية مناسبة منها، النوع الأول و هو الدهون غير المشبعة الأحادية تقدر تلاقيه في المكسرات زي الللوز و الكاجو و الفول السوداني و الزيوت النباتية زي زيت الزيتون، و زبدة الفول السوداني و الأفوكادو، و النوع ده بيحسن من مستوى الكوليسترول في دمك و بيقلل من أحتمالية تكون جلطات و أمراض قلبية.

النوع التاني، و هو الدهون غير المشبعة الثنائية، مصدره الأساسي من النباتات، و الأوميجا-3 اللي أتكلمنا عن أهميته قبل كده هو جزء من الدهون دي و له دور مهم في صحة قلبك و تظبيط ضغطك و نبض القلب، و ده تقدر تحصل عليه من السلمون و السردين و بذور الكتان و الجوز، الدهون غير المشبعة الثنائية غير الأوميجا 3 موجودة في زيت الدرة و زيت زهرة عباد الشمس و السمسم، و كلها دهون بتحققلك صحة أحسن بس بدون ما تكتر منها.

فحاول تدريجياً تستبدل الدهون غير الصحية بدهون تفيدك و ده هيفيد صحتك و صحة قلبك!

It's only fair to share...Share on Facebook727Share on Google+0Pin on Pinterest0Tweet about this on Twitter
الكلمات الدليلية:,

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *