الفاكهة الجبارة! إيه هي و تلاقيها فين؟

أكيد إحنا ماجبناش التايهة لو قعدنا نقولك قد إيه الفواكه مهمة وقد إيه هي مفيدة. بس كام واحد مننا عارف هي مفيدة ليه غير الكلام اللي دايما بنسمعه إن البرتقال حلو للبرد علشان فيتامين سي والكلام العام ده؟ وياترى فيه فاكهة أفيّد من التانية؟

فيه فواكه فايدتها أكتر من الباقي وفيها عناصر غذائية جبارة – ودي فيه ناس بيسموها الفواكه  الخارقة. بس طبعا مش كل فاكهة تبقى خارقة فيه حاجات أفيّد من التانية. الفواكه اللي بيسموها خارقة هي اللي فيها نسب عاليه من مضادات الأكسدة والألياف والفيتامينات والمعادن وحاجات زي كدة كتير من اللي جسمك محتاجها علشان يبقى صحي أكتر أو حتى علشان وشك ماتملاهوش التجاعيد.

 Super - Fruit

الجامد بقى في الفواكة ديه إيه؟ إنها من الأخر كدة في كل حتة – يعني ولا محتاج تصرف فلوسك كلها على الأكل ولا تروح أخر الدنيا علشان تجيب حاجة خزعبلية مش موجودة في حتة أصلا.

عندك مثلا التفاح. عارف جو تفاحة كل نهار تبعد الطبيب عن الدار والكلام ده؟ أمثالنا الشعبية والله ياجماعة جامدة بس إحنا اللي مش بنركز، التفاح ده قشره مليان مضادات أكسدة ومضادات هيستامين علشان اللي مننا بيعانوا من حساسية وكمان مليان مضادات للإلتهاب. فيه بعد كدة؟ اه فيه! في دراسة بتقولك لو كلت حوالي 5 تفاحات في الإسبوع ممكن تحسن قدرة عمل رئتك.

فاكهة تانية عادية جدا وبرضو جامدة جدا، الموز. الموز ده بقى بسبب البوتاسيم اللي فيه ممكن يساعدك توطي الضغط. ومش بس كدة ده كمان أكتر حاجة ممكن تساعد أي حد بيعمل ريجيم – لو جعت كلّك موزة علشان مليان بنشويات من نوع خاص بتملى معدتك وتحسسك إنك شبعان فمتاكلش تاني كتير.

 Super - Fruit

لو إنتِ بقى أهم حاجة عندك بشرتك ونعومتها وصحتها عليكي وعلى الكانتالوب علشان في كمية مهولة من فيتامين أ ومشتقاته اللي بتحفز الخلايا وبتدي نتيجة كأنها غسول أو مقشر طبيعي لبشرتك.

أما الجريب فروت فممكن بيقلل الكوليسترول في الدم، والموالح زي البرتقال والليمون واليوسفي واللذي منه زي ما طبعا كلنا عارفين مصدر هايل لفيتامين سي اللي ممكن يساعدك ضد أضرار الشمس مثلا أو يمنع ظهور بقع على الجلد اللي بيسببها السن.

الفاكهة مهمة قوي، وليها فوايد أكتر بكتير مما إحنا متخيليين. إتأكدوا دايما إنكوا بتأكلوا فاكهة على الأقل مرة في اليوم

It's only fair to share...Share on Facebook0Share on Google+0Pin on Pinterest0Tweet about this on Twitter
الكلمات الدليلية:, , ,
التعليقات(1)
  1. salma 02/04/2016

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *