طرق منع الحمل و فرص نجاحها

الحمل مش موضوع معقد، القصة كلها أن بويضة طالعة من المبيض بتقابل حيوان منوي بيعرف يعوم أحسن من صحابه فبيخصب البويضة و مع بعض بيكونوا خلية واحدة! و بتبدأ مراحل الحمل لما البويضة المخصبة تلزق في جدار الرحم و تبدأ تكبر، البويضة دي بتكون خرجت من المبيض ما بين اليوم الـ 12 لليوم الـ 16 من الدورة الشهرية و بتعيش لمدة 24 ساعة بس، لو محصلش تخصيب خلالهم بتروح فرصة الحمل و خلاص مفيش بيبي.

landscape-1445722895-g-contraception-149321478

طرق منع الحمل

طب يا ترى طرق منع الحمل مفيدة قد إيه في تفادي عملية التخصيب ؟ طرق منع الحمل 4 أنواع و كل نوع فيه طرق كتير، و عشان كده هنتكلم عن أشهر الطرق في مصر و مدى فاعليتها حسب مركز السيطرة على الأمراض.

  1. بنخلي بالنا: نقدر نستعمل أقدم طريقة في التاريخ لمنع الحمل بالقذف خارج المهبل، و دي طريقة بيستخدمها أزواج مصريين كتير لأنها طبيعية و مريحة و آمنة حبتين، و كمان مفيش أي تأثيرات صحية أو هرمونية سلبية، لكن بنفس الوقت الطريقة دي محتاجة تحكم و خبرة و مش مناسبة أوي لليلة الدخلة، الراجل لازم يكون قادر يحدد كويس اللحظة المناسبة و عشان كده الطريقة دي معدل فشلها عالي و مش مناسبة أوي لأي حد عايز يتحكم في الحمل بشكل فعلي لأنها طريقة معتمدة على الحظ و يا تصيب يا تخيب! فالأحسن أن مايعتمدش عليها لوحديها.
  1. اللولب: طريقة مشهورة جداً في مصر، و ده طبعاً لأن معدل نجاحه عالي جداً، تحديداً 99.2 في المية، اللولب عبارة عن قطعة نحاسية على شكل حرف T و طالع منها خيط رفيع بيثبتها الدكتور في الرحم فبتقضي على الحيوانات المنوية، و ميزة اللولب الأساسية أنه بسيط و فعال و مش بيحتاج مجهود ولا تركيز في أن تحافظي على جدول محدد ولا أن تعاني من الآثار الهرمونية السلبية لبعض الطرق التانية.
  1. الواقيات الذكرية أو الكوندوم: طريقة معروفة جداً و بتعتمد ببساطة على منع الحيوانات المنوية من دخول الرحم، لكن للأسف معدل فشلها عالي جداً و بيوصل لـ 18 في المية، ده غير أن الواقيات الذكرية مش رومانسية و بتقلل الأستمتاع و بتبوظ الموود لما بيجي وقت لبسها بالطريقة الصح!
  1. حبوب منع الحمل: و دي طريقة معتمدة على الهرمونات و من ضمنها هرمون الأستروجين و هرمون البروجستين، و معدل نجاح الطريقة دي 91 في المية، لكن فيه حالات بينصح الدكاترة أنه ماتستخدميش الحبوب معاها زي لو بتدخني و عمرك أكتر من 35 سنة، و كمان لو سرطان الثدي موجود في عيلتك أو جت ليكي جلطات قبل كده، لكن لو معندكيش المشاكل دي و تقدري تاخدي حبوب منع الحمل، فمعدل نجاحها ممكن يوصل لـ 99.9 في المية لو أتخدت بالطريقة الصح حسب WebMed، عشان بتشتغل بكذا طريقة، و منهم بالأساس إيقاف عملية الأباضة، و طبعاً لو مفيش بويضة يبقى مفيش تخصيب، و لأن الحبوب بتكون فعالة من أول شهر لأستعمالها، فبننصحك بأن تبدأي تاخديهم مع دورتك اللي قبل ليلة فرحك.
  1. حبوب الطواريء: حباية تاني يوم، الحباية اللي بتاخديها لو مش عايزة حالياً لكنك في نص دورتك و البويضة موجودة، الحباية دي تقدري تاخديها لغاية 5 أيام بعد العملية الجنسية عشان تمنع الحمل، و تقدري تلاقيها عند بعض دكاترة أمراض النساء في مصر لكن مش متوفرة في الصيدليات، و طبعاً بننصحك بأن تاخديها في أسرع وقت ممكن لأن كل ما تاخديها بدري أكتر كل ما فرصة نجاحها بتكون أعلى.
  1. متابعة الدورة: لو دورتك منتظمة، يبقى بيكون عندك حوالي 9 أيام ممكن يحصل فيهم تخصيب خلال كل دورة، و ده معناه أن خلال الأيام دي تقدري تتفادي الجنس أو تاخدي بالك خلاله، لكن الطريقة دي ليها مخاطرها برضه خصوصاً لو حسبتك مش مظبوطة، فيه حالياً كذا أبليكيشن موجودين بيساعدوكي على متابعة دورتك و مواعيد عملية الأباضة والخصوبة، و منهم أبليكيشن Glow، جربيه و هيساعدك.
It's only fair to share...Share on Facebook0Share on Google+0Pin on Pinterest0Tweet about this on Twitter

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *