فوائد الصوم لجسم الإنسان

“يا أيها الذين أمنوا كتب عليكم الصيام كما كتب على الذين من قبلكم لعلكم تهتدون.”  صدق الله العظيم
رمضان بدأ ومعاه بدأت الأمة الإسلامية صيام الشهر الكريم. كتير مننا إتعود على الصيام من صغره لأنه طبعا جزء من ديننا الإسلامي، وكلنا عارفين فوائد الصيام الإجتماعية زي مثلا الإحساس بالفقراء والعطاء والتقارب وصلة الرحم وغيرهم كتير من القيم والمبادئ اللي وصانا بيهم الرسول (ص). أما اللي كتير مايعرفهوش هو فوائد الصيام لجسمك.

الصوم ممكن يكون ليه فوايد كتير جدا للجسم. خلونا الأول نشوف إيه اللي بيحصل في الصيام. أولا جسمنا بيدخل عادة في حالة “الصيام” بعد 8 ساعات من أخر وجبة- يعني لما تكون المعدة والجسم خلص عملية إمتصاص المواد الغذائية المفيدة واللي الجسم محتاجها من الأكل. بعد ال8 ساعات الأولى الجسم بيتحول لحرق الجلوكوز اللي في الكبد علشان ينتج طاقة. بعد مرحلة حرق الجلوكوز أو لما مايبقاش في جلوكوز للحرق بيبتدي الجسم يحرق دهون ولحد هنا فالصيام أمن وممكن كمان يكون صحي جدا. أما المرحلة ال بعد حرق الدهون فهي دي اللي ممكن تكون خطيرة لأن فيها بيبتدي الجسم يكسر نسيج العضلات ويستخدم بروتين في الحرق لإنتاج الطاقة وطبعا ده ممكن يكون خطير جدا لكنه ما بيحصلش غير بعد كام يوم صيام متصل.

طيب وصيام رمضان فين من الكلام ده؟ صيام رمضان أمن جدا لأن الجسم بيقدر ياخد كل اللي محتاجه من تغذية في وجبتين الفطار والسحور وكمان علشان صيام رمضان من الفجر للمغرب بس فالجسم ما بيعديش مرحلة حرق الدهون ولا بيحرق بروتين.

طيب ياترى الصيام ليه فوائد؟ أكيد، أبحاث كتير أثبتت إنك لو صمت في فوائد كتير جدا لجسمك زي مثلا التحكم في نسب الكوليسترول والسكر في الدم وكمان التخلص من الدهون وإنقاص الوزن.

كمان لما تصوم هيساعد جسمك يتخلص من السموم اللي فيه لأنها بتبقى متخزنة في خلايا الدهون اللي بتتحرق أثناء الصيام.  وده غير كمان إن بعد كام يوم من الصيام من الفجر للمغرب هتحس إن مزاجك أحس وإنك منتبه أكتر وده بسبب الإندورفين اللي الجسم بيفرزه بسبب الصيام. الصيام كمان هيدي الفرصة لجسمك إنك يجدد خلاياه بعد ما يتخلص من السموم اللي في الجسم.

لكن علشان تحس بفوايد الصيام دي لازم تأكل زي ماكنت بتأكل قبل رمضان – أكل صحي ومتوازن- يعني بلاش تكتر من الحلويات مثلا أو علشان صايم طول اليوم تأكل قد اللي كنت بتاكله 4 مرات لأن ده هيلخبط جسمك وخصوصا عملية التمثيل الغذائي وممكن تلاقي نفسك بدل مثلا ما تحرق دهون ذودت نسبة الدهون في جسمك.

الشهر الكريم فرصة عظيمة مش بس إننا نطهر نفوسنا ونقرب من ربنا ونستمتع بالروحانيات الجميلة. هو كمان فرصة رائعة إننا نحافظ على صحتنا ونبدأ عادات صحية جديدة. إستغل الفرصة دي علشان تبقى حياتك صحية أكتر… ورمضانك كريم!

 

It's only fair to share...Share on Facebook0Share on Google+0Pin on Pinterest0Tweet about this on Twitter

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *